31 МАМЫР – ОҚУ ЖЫЛЫНЫҢ СОҢҒЫ САБАҒЫ ӨТЕТІН КҮН.  

НЕГІЗ:

Қазақстан Республикасы Оқу-ағарту министрлігінің  2023 жылғы 10 сәуірдегі № 88 «2022-2023 оқу жылын аяқтау және орта білім беру ұйымдарында білім алушыларды қорытынды аттестаттаудан өткізу мерзімдерін бекіту туралы»   бұйрығы.

25-31 МАМЫР АРАЛЫҚТАРЫНДА БЕКІТІЛГЕН КЕСТЕГЕ СӘЙКЕС БАРЛЫҚ МЕКТЕПТЕРДЕ  ТАҚЫРЫПТЫҚ СЫНЫП САҒАТТАРЫ ӨТКІЗІЛЕДІ.

ОНЫҢ ІШІНДЕ:

• 25-26 мамыр - 1-4 класс аралығы. Сынып сағатына ұсынылатын тақырыптар:
• «Отан – отбасынан басталады»;
• «Кітап – сарқылмас бұлақ;
• «Татулық – достық кілті».

• 29-30 мамыр – 5-8 класс аралығы. Сынып сағатына ұсынылатын тақырыптар:
• «Отбасы – Отан тірегі»;
• «Тарихты білу - парызың»;
• «Ұлы тұлғалар ұмытылмайды».

• 30-31 мамыр – 9 – 11 класс аралығы. Сынып сағатына ұсынылатын тақырыптар:
• «Отбасы – тәрбие бесігі»;
• «Алаш зиялылары»;
• «Патриотизм – ұлттық рухтың асқақ белгісі».

Сынып  сағатының мақсаты – оқу жылының қорытындысын шығару,  жазғы демалыс кезеңіне балаларды әзірлеу.

Сынып сағаттарында негізінен патриотизм, отанды сүю, достық, татулық, ел тарихына, саяси репрессия мен аштық құрбандарының  есімдеріне құрмет таныту сынды ақпараттар айтылуы қажет. 

Сонымен қатар, дәстүр бойынша мұғалім сынып сағатында жазғы демалыс кезінде  оқу үшін кітаптар,  қарауға болатын фильмдер тізімін ұсынады.

Сондай-ақ, жазғы демалысты тиімді ұйымдастыру жолдары,   қосымша білім беру ұйымдарына қатысудың тиімділігі туралы айтылады.

ЕСКЕРТУ:

Сынып сағаттарына бекітілген кесте бойынша облыстық білім басқармасының, аудандық (қалалық) білім бөлімдерінің мамандары, түрлі деңгейдегі (облыстық, аудандық, қалалық) кәмелетке толмағандардың  істері және олардың құқықтарын қорғау жөніндегі комиссия мүшелері қатысып,  жазғы демалыс кезіндегі қауіпсіздік шаралары (өрт, су), кәмелетке толмағандар арасындағы және оларға қатысты құқықбұзушылықтар мен қылмыстың, зиянды әдеттерден арылудың, интернетке тәуелділіктің алдын алу бойынша ақпараттық-түсіндіру жұмыстарын жүргізуі қажет.

«СОҢҒЫ ҚОҢЫРАУ» САЛТАНАТТЫ ШАРАСЫ

1, 4, 9 және 11-сынып оқушылары үшін  1 маусым күні өткізіледі.

Салтанатты шараның басталу уақыты -  сағат 9.00, ұзақтығы               45 минуттан аспауы тиіс.

ӨТКІЗІЛЕТІН ОРНЫ:

• Мектеп ауласы;
• Мектептің мәжіліс немесе спорт залдары

 ЕСКЕРТУ:

 «Соңғы қоңырау» салтанатты шарасына қатысушылар МІНДЕТТІ ТҮРДЕ  мектеп формасында болуы қажет.

11 СЫНЫПТАРҒА АРНАЛҒАН МЕКТЕП БІТІРУ ШАРАЛАРЫ

Аттестат алу – әрбір түлектің ересек өмірге қадам басуын, мектеппен қоштасуын бейнелейтін маңызды оқиғалардың бірі.

 Жалпы орта білім беру туралы аттестатты 11-сынып түлектеріне тапсыру салтанатын мектеп қабырғасында 20-22 маусымда өткізу ұсынылады.

 МЕКТЕП БІТІРУ ШАРАСЫНЫҢ МАҚСАТЫ:

Отансүйгіштік пен әлеуметтік жауапкершілікті, ұстаздарға, ата-аналарға, достарына алғыс сезімін, алтын ұя – мектебіне деген құрмет пен сүйіспеншілікті қалыптастыру.

               МІНДЕТТЕРІ:

• Қазақстандық мектеп түлектерінің имиджін арттыру;
• Білім құндылықтарын қалыптастыру, үздіксіз білім алу қажеттілігін қалыптастыру;
• Патриотизмге тәрбиелеу, жастардың бойында жоғары әлеуметтік белсенділігін және бәсекеге қабілеттілігін дамытуға ықпал жасау;
• Болашақ мамандықты таңдау мақсатында кәсіби бағдар беру жұмысын белсендіру;
• Қазақстан Республикасының лайықты азаматы болуға тәрбиелеу.

Мектеп бітіру шарасының  ұйымдастырушылары - мектеп әкімшілігі, қамқоршылық кеңесі, сынып жетекшілер

МЕКТЕП БІТІРУ ШАРАЛАРЫН ӨТКІЗУ БОЙЫНША ҰСЫНЫСТАР:

• Бітіру шаралары мектеп алаңында, мәжіліс немесе спорт залдарында өткізіледі;
• Түлектер іс - шараға міндетті түрде мектеп формасымен қатысуы қажет;
• Шараның басталуы - сағат 10.00;
• Шараның ұзақтығы – 40 – 45 минут.

 ІС-ШАРАНЫҢ АЛГОРИТМІ:

• Мектеп директорының тілегі;
• Ата-аналардың құттықтауы;
• Сынып жетекшінің құттықтау сөздері;
• Түлектің сөзі;
• Аттестат тапсыру;
• «Алтын белгі» және ерекше үлгідегі аттестат иегерлеріне құрмет көрсету.

СЫНЫП САҒАТТАРЫН, СОҢҒЫ ҚОҢЫРАУ, АТТЕСТАТ ТАПСЫРУ  ШАРАЛАРЫН ӨТКІЗУ БАРЫСЫНДА

Педагогикалық этика және сыбайлас жемқорлықтың алдын алу мақсатында ТЫЙЫМ САЛЫНАДЫ:

• іс-шараны өткізуге ата-аналардан ақшалай қаражат жинауға;
• әкімшілік және педагогикалық қызметкерлерге сыйлықтар алуға немесе беруге;
• іс-шараларды өткізуге аниматорларды, мерекелік агенттіктерді, жеке студияларды тартуға;
• мектеп бітіру кешін сән-салтанатты өткізуге (сыныпты безендіру, түлектің сыртқы келбеті және т. б.);  
• аспанға шар ұшыруға;
• мерекелік үстелдер, салтанатты дастархан ұйымдастыруға;
• жалға берілетін автокөліктерді тарта отырып, қала бойынша көшпелі экскурсиялар өткізуге;
• мектеп бітіру іс-шарасын мейрамханаларда, кафелерде және басқа да ойын-сауық  орындарында ұйымдастыруға;
• «Алтын белгі» және ерекше үлгідегі аттестат иелерін бұқаралық марапаттауды алаңдарда (ауыл округтерінің, аудандардың, қалалардың, облыс орталықтарының алаңдарында) өткізуге.